Article

Daur e Saeedi

“Basher ki sar-bulandi mein bhi koi raaz hota hey Jo sar dey dey sar-e-maydaan wo sarfaraz hota hey
Jahan per khatam hoti hain hudood-e-aqal-e-insaani Wahan se Shaan e Saeedi ka agaaz hota hai “

Hazrat Hadi Rehbar Rehnuma Sufi Saeed Ali Shah ne 1969 me silsila e shattariyah me Hazrat Sufi Hidayatullah ke hathon bait li. Saal 1975 me khilafat hasil ki aur saal 1981 me Sajjada Nashini se Sarfaraz hue.. Ek Kaamil Buzurg ke wali Ahad hote hue bhi unhone is baat ko kabhi bais e Ana nahi hone diya.. apne peer ke hathon bik kar peer parasti aur khidmat e silsila e shattariyah me Tamaam umr mashgool rahe. Apne peer ki har baat ko patthar ki lakeer mana aur apni raza ko raza e peer me fana kar diya. Sufi Hidayatullah Shah ke Visaal ke baad Silsile ki Saari zimmedariyon ko apne hathon me le kar baa khubi nibhaya..Tareeqat ki adaaygi ke sath sath badalte zamane ki zarooraton ko samjha aur apni Roohani aur Jismani mehnat se Silsile ka naam duniya bhar me maqbool kiya. Tareeqat ke usoolon ko zinda rakhne ke liye har qurbani dete rahe aur apna Azeem Martaba hasil kiya. Apni daur e zindagi me dunyaavi makaam, maal o zar se bhi nawaaze gaye aur agar chahte toh aur bohut kuch paa sakte thhe. Magar duniyavi makaam ko unhone apne marzi se tark kiya aur Fakiri ko apni raah bana li..
Unke saari khidmaton ko shumaar me laana toh bohut mushkil hai lekin kuch khaas kaarname hume yaad aate hai

1 – Jashn e Sadi : Hazrat Sufi Sarmast Ali Shah Qalander ke 100 ve Sandal ki khushi me Alishaan jashn apni sar parasti me manaya.. Sufi Sarmast ke tasveer wale tamge aur ek kitaab bhi shaya ki.

2 – Jashn e qalandari : Jab Ruhaani hukm mila tab unhone ne ye aylaan kar diya ke Hazrat Ghafoor Shah ko Qalandari hasil hui aur Jashn e Qalandari ka dhoom dhaam se manaya.

3 – Website : Silsila e Shattariyah ke urooj ko duniya bhar me mashoor Karne ke liye www.sufishattari.com ka aagaaz kiya

4 – Wikipedia : Duniya ki sab se badi information website ne Hazrat Sufi Saeed Ali Shah ko Shattari silsile ka haafiz mana aur unke shijre ko apni site par jagah di.

5 – ASI for Abdullah shattar mast : Unki Sarparasti me Archelogical Survey of India ne tehriri taur pe maan liya ke Mandu kile ke dargah Shattari buzurgh Hazrat Abdullah Shattar Mast ki hai .. SubhanAllah

6 – Aurton ki Taazeem : ek Mard Faqeer ki pehchaan dete hue unkhon ne silsile me Aurton ka martaba buland kiya.. kaafi mukhalefat ke baawajood unhone Aurton ko hikarat se dekhne wale mardon ko muh Todd jawaab diya.. humaari Shattari gharaane ki Maa, behne aur betiyaan taa umr unke karzdaar rahegi

7 – Tableekh : silsila e shattariyah ke shaakhon ko Mumbai, Pune, Bijapur, Gwalior, kumbhefal, Usmanabad aur mulk ke bahar bhi bakhoobi Phehlaya

8 – Murshid ki Mazaar : apne mureedon ko sath le kar apne Murshid ki khoobsurat mazaar Nandura Shareef me banwayi.. aur ye bhi khayal rakha ke Hazrat Sufi Sarmast ki mazaar se zyaada aan baan wali na ho.. SubhanAllah

9 – Taameeri Kaam : apne daur e zindagi me apne mureedon ko le kar Hazrat Allaudin Kazan Shattari ki mazar par Chat ka kaam anzaam diya.. Hazrat ne khidmat qubool ki hai toh humari ilteja karte hai ke unke sadke me Sufi Saeed Ali Shah ke Mazar par bhi zald hi chat ho jaye aameen

10 – Nandura tameri kaam : Humare murshid ne Nandura Shareef me Khankaa, Dargah ki dewaar, Aastana, Mustafee, Paani ki Tanki ka tamiri kaam Hazrat Sufi Sarmast ki Dua se anjaam diya

11 – Hazrat Abdullah Shah ka Urs Mubarak : buzurgon se Ruhani Hukm paa kar unhone ne Bijapur me Hazrat Abdullah Shah Husaini ka Urs Manane ka riwaaj kaayam kiya

12 – Gwalior ki Mazaar : apne murshid aur peer bhai Sufi Shafi Saheb ke sath mil kar ASI se permission nikal kar Gwalior dargah ke ek hisse ki marramat ka kaam kiya

13 – International : website ke zariye Hazrat ne Bohut se International bhaiyon ko silsile ka ilm diya.. 150 angrez ho Pune aur Gwalior aaye unko apne ilm se mala maal kiya.. ek video bhi banayi jo aaj bhi youtube per duniya bhar ke ashiqon ko Shattari silsile ke bare me malumaat de rahi hai.

14 – Charity : Hazrat ko bacchon aur taalim se badi mohabbat thi aur education sponsorship, naat, drawing competition unki hausla Afzaai ke liye shuru ki

15 – Unki qaalam se : Hazrat ne apni Kalam se bohut se Kalaam, Nazm aur kitaabon ko likha jo aaj bhi mashaal e raah hai hum mureedon ke liye.

16 – unke hukm se humare buzurgon ke kalaam maroof gayak Toshi Sharib ke awaaz me record kiye gaye..

Qurbaan Jaaon Mai apne peer par, unke pyale par, unki khidmaton par, unki riyaazat par, unki sarparasti par, unki Aashiqi e Shattari par aur unki Aala, khaalis o paak nisbat par..